UNDIL iha Sentru Investigasaun no Formasaun Avansadu (CIFA), ne’ebé kria tuir Despaxu Nº 03/Reitor-UNDIL/IX/2023, no mos iha Sentru Peskeza no Servisu Komunitáriu (Artigu 30 Estatutu Orgániku UNDIL nian).
Sentru Investigasaun no Formasaun Avansadu (CIFA) UNDIL nian mak unidade ida ba investigasaun sientífika no formasaun avansadu, ho autonomia iha jestaun sientífika, pedagójika no administratíva.
Iha nivel nasional, CIFA hala’o servisu iha armonia ho estratéjia jerál Institutu Nasional Siénsia no Teknolojia (INCT) Timor-Leste nian.
Iha nivel internasionál, CIFA implementa polítika investigasaun Universidade Díli (UNDIL) nian, konsidera katak UNDIL asina ona Deklarasaun São Francisco kona-ba Avaliasaun Investigasaun, Deklarasaun Budapeste kona-ba Siénsia Aberta, no mos mak signatáriu no membru husi Coalition for Advancing Research Assessment (CoARA).
Investigasaun sientífika no programa formasaun avansadu (mestradu, doutoramentu no pós-doutoramentu) ne’ebé CIFA promove, dezenvolve, organiza no implementa, halo liu-liu ho envolvimentu akademiku no investigador sira husi Komunidade País Sira Língua Portugésa (CPLP), la exclui kolaborasaun internasionál seluk.
Sentru Investigasaun no Formasaun Avansadu (CIFA) mak órgaun espesialmente responsavel ba edisaun Revista Sientífika UNDIL – Universidade Díli.
Pró-Reitor Área Investigasaun, Pós-Graduasaun no Kooperasaun ho CPLP, Prof. Doutór Manuel Azancot de Menezes, mak superviziona no koordena CIFA.
Prof. Doutora Cláudia Vaz mak Pontu Fokal UNDIL iha Coalition for Advancing Research Assessment (CoARA).
Regra sira kona-ba estruturasaun, organizasaun no funsionamentu CIFA nian defini iha nia Regulamentu rasik.
UNDIL mos iha Sentru Peskeza no Servisu Komunitáriu, ne’ebé funsiona tuir pontu 3 husi Artigu 30 Estatutu Orgániku UNDIL nian.
Sentru Peskeza no Servisu Komunitáriu, ne’ebé iha Diretór ida, kompostu husi estrutura interligadu rua: Sentru Peskeza no Servisu Komunitáriu (pontu 3 Artigu 30).
Sentru Peskeza organiza tuir Grupu Investigasaun sira ne’ebé Dekanu Fakuldade sira propõe no Pró-Reitor Área Pós-Graduasaun, Investigasaun no Kooperasaun ho CPLP aprova (pontu 4 Artigu 30).
Servisu Komunitáriu funsiona tuir lózika Projetu Intervensaun Komunitária no iha ligasaun ho Fakuldade hotu-hotu (pontu 5 Artigu 30).
Diretór Sentru Peskeza no Servisu Komunitáriu mak Doutór Dionízio G. M. Fraga, PhD, dosente Fakuldade Ekonomia UNDIL nian.