Iha semana ikus fulan Novembru tinan 2024, Konferénsia FORGES dala-14 – Fórum ba Jestaun Ensinu Superior iha País no Rejiãu sira ne’ebé uza Língua Portugésa (FORGES) remata. Konferénsia ne’e hala’o iha Universidade Politéknika Macau (Xina) ho lema “Inovasaun ba Dezenvolvimentu iha País no Rejiãu Língua Portugésa sira.”
Akadémiku no investigadór sira husi instituisaun ensinu superior iha Angola, Brasil, Cabo Verde, Guiné-Bissau, Macau, Moçambique, Portugal no São Tomé no Príncipe partisipa ho forma presensial no à distánsia.
Iha serimónia abertura, iha Mesa Honra marka prezensa ex-Prezidente FORGES, Margarida Mano – ne’ebé tinan ida ne’e vizita ona UNDIL – no Reitor Universidade Politéknika Macau, Marcus Im Sio Kei.
UNDIL hetan reprezentasaun husi Pró-Reitor Área Investigasaun, Pós-Graduasaun no Kooperasaun ho CPLP, M. Azancot de Menezes, ne’ebé eleitu sai Vogal Efetivu Direksaun FORGES ba períodu 2024–2027.
Iha mandatu foun FORGES nian, iha renovasaun prezidénsia sira iha órgaun sosiál no reprezentante sira husi nasaun barak CPLP nian. Prezidente Direksaun FORGES foun mak Marcelo Bizerril husi Universidade Brasília (Brasil); Prezidente Assembleia Geral mak Margarida Mano husi Universidade Katólika Portugál; no Prezidente Conselho Fiskál mak Maria da Conceição Mendes husi Instituto Superior Edukasaun Benguela (Angola).
Konferénsia FORGES dala-15 sei hala’o iha fulan Novembru 2025 iha Timor-Leste, no sei organiza hamutuk husi FORGES, UNTL, UCT no UNDIL.